用人勿疑?Yes and No 啦

emoji1

【《通識夾心餅》係一個通識科主任嘅自白,希望搞清楚究竟學校決策點樣達成】

文:夾心餅 (中學通識科主任一名)

我相信你個人、我相信你個心、我亦相信你嘅能力,正因為咁,我去做少少嘢去成全你做好你負責做嘅事。呢啲唔係「疑」,而係「信」。

講就容易做就難

成日聽人講:「疑人勿用,用人勿疑。」講係易,但喺學校入面做中層管理人員,邊有得咁瀟灑?

要做到咁高境界,有好多先決條件,作為夾心餅係咪可以保證先?例如仲話「疑人勿用」喎,好聽就話有一班同事跟你,但其實班同事又唔係你揀,即使係你揀都唔係好多人選俾到你揀,到最後好可能係有班老師自己嗰科凸堂被逼要嚟教通識,係咪啱教無保證。你估你係 Steve Jobs 下下可以淨係請 A Players 咩?咁最後疑唔疑你都要用㗎,到你揀㗎?

「用人勿疑」都係一樣。既然人都唔係你揀 (或者最少唔係完全係你揀),咁我好難要求同事做事方法同我完全 100% good fit 㗎喎。唔好話同事勤唔勤力或者叻唔叻嗰啲先。假設個個都勤力、個個都叻,但係做事手法總有唔同啦啩?就用返教通識科做例子,有啲老師鍾意用議題教學、有啲操題目、有啲鍾意上堂多啲互動搞辯論、角色扮演咁,你好難話佢哋唔啱㗎喎。

更加況且,玩 RPG 人物都有不同屬性啦。有啲係會用魔法、有啲戰鬥力強、有啲會恢復同伴「心心」值,你好難咁啱成個科組啱啱好樣樣齊。你估而家學校 Open Day 儲印仔,有得你要邊個就邊個咩?咁嘅環境,100% 交晒嘢俾同事跟,即使撇開佢有無心或有無能力跟,我都好難完全放心囉。

學生啟發箇中玄機

之不過咁,古人講嘢梗有佢嘅道理。講真,你同我都想在一個被人信任嘅環境之下工作。唔駛一日到黑驚自己做錯嘢或者做咗乜嘢不合上意,就會被人怪罪落嚟。做老師的有時被害心理好嚴重,合約教師固然驚無得續約,常額教師都會諗會唔會被人燉冬菇或者編去教差班。結果乜都唔敢做,或者乜都問科主任點做,人唔煩你都煩,咁點做嘢唧?

況且事實上,係咪到你下下話唔信人先?你咁叻你自己做晒佢囉!咁又唔掂㗎嘛。一來點做得晒?二來真係會有啲有心嘅同事,你做晒所有嘢佢反而唔鍾意,亦都令佢無咗一個學嘢嘅機會。我時刻記住,培訓年輕一代係我哋夾心餅份糧包埋嘅職責嚟㗎。

咁設身處地,我哋做科主任嘅又的確要體諒同事有呢種壓力,要放手、俾多啲信任,咁先做到嘢㗎喎。

「咁你講晒啦,咁又唔係咁又唔係,想點?」我都諗咗好耐。結果所謂教學相長,有一年帶學生會,阿主席俾咗靈感我明白應該點做。

阿主席係咁嘅。各個活動分晒俾各位幹事做負責人 (PIC),開會時 PIC 就匯報個活動點做,佢就自己攞本簿仔係咁抄抄抄。到 PIC 講到有邊個部分唔識做或做唔掂,佢會話:「得啦,阿咩哥,啲大嘢你搞啦,呢樣等我幫你搞掂佢啦。」明明有時我作為顧問老師一聽,佢「幫手」搞掂嘅係好重要嘅部分,但佢從來唔會爭功 take credit,PIC 個大名仍然由幹事做,佢就幫幹事們執漏,從來永無半句怨言,永遠嘻嘻哈哈笑笑口。結果嗰一屆學生會係公認近年最好嘅一屆。

真。疑人不用,用人不疑

我明啦。原來「疑人不用,用人不疑」,唔係話你乜嘢都放晒手俾人去做。我放得俾你做,我信你,我真係信你;但與此同時我明白人性,人係有缺憾、有盲點嘅。你嘅缺憾同盲點,我幫你補,唔係唔信你,係我知道人無完人。我相信你個人、我相信你個心、我亦相信你嘅能力,正因為咁,我去做少少嘢去成全你做好你負責做嘅事。呢啲唔係「疑」,而係「信」。(係咪好高境界呢?我懷疑阿主席自己都唔知係咁。)

明白之後,我發覺咁樣同人合作真係開心好多(唔係左膠上身)。始終,我係夾心餅中間塊饀,唔係腦細,同事俾面叫聲你科主任,否則我乜嘢都唔係。開開心心,又做到嘢,月尾又有糧出,係咪夾心餅嘅夢想?