公平定專業條綫點劃先啱?

line

文:夾心餅 (中學通識科主任一名)

上集都話,作為中層管理人員,尤其是係做通識科主任麻煩事係特別多㗎啦,所以咪成日做夾心餅囉。不過咁喎:夾心餅都有分夾乜嘢饀、有厚有薄,而通識科主任最具挑戰性嘅都莫過於係去決定究竟夾乜同點夾嘞。

通識科科主任都知啦,我哋係各科人手集中營,邊科人手有剩堂就過嚟教通識。正所謂百川匯流人才濟濟,一來有人幫手教、二來亦集百家所長,其實都唔係壞事。

之不過咁,間中都有啲問題要處理吓。話說是咁的:早排又到咗計下學年人手嘅時候。某科嘅科主任同阿副校講:「我哋科三個人,會輪流每次派兩個人出嚟教通識,兩年轉一個人(AB -> BC -> CA -> AB⋯⋯咁),我哋自己內部傾過咁係最公平嘅方法。」

「唔得喎,」我話。「教通識要與時並進,課程內容、考評局出卷特性等等都不停更新,你教教下又停兩年,返嚟已經甩晒啦。咁好影響我哋科教學效能喎。你哋自己就要公平,但到時學生出去通識炒晒,咁對我同通識學生又公唔公平先?我覺得咁樣好唔專業囉!如果本科人手不足要召回老師我無問題,若果唔係咁無 commitment 我唔接受囉。」

但佢都係企硬,話呢個已經係佢哋三個傾過好多次,覺得係最完美最公平嘅方案喎。

完美方案?有呢樣嘢嘅咩?如果有個方案係可以人人happy又公平又解決到問題嘅,駛鬼你做科主任咩?個個照 dup 個方案咪得囉!咁 SGM 都可以慳番唔駛每個月出多幾萬銀俾你啦。

所以作為一個夾心餅,科主任要劃條綫。一邊係所謂公平(即係下屬happy)、一邊係專業理念(即係肯蝕下底)。點劃?

完美方案?有呢樣嘢嘅咩?如果有個方案係可以人人happy又公平又解決到問題嘅,駛鬼你做科主任咩?個個照 dup 個方案咪得囉!咁 SGM 都可以慳番唔駛每個月出多幾萬銀俾你啦。

第一,分莊閒。坦白講,我若然拎呢個 case 入校長室,你估校長會話寧願你happy定學生happy?一定係以學生同學科利益行先。咁作為某科科主任,係咪木一早計掂自己有幾多籌碼先同人講數?

第二、劃底綫。如上述,其他科有人手,通識科一家便宜兩家着,實在義不容辭。但係唔係無底綫喎。底綫對我來講就係我要捍衞我負責呢一科嘅專業囉。

第三、在可行與可欲之間劃綫。我想抗拒對方嘅做法,係咪可行?我權力範圍、人際關係、校方係咪企我呢邊(好多校長高層可能係唔想理)等等等等,好多因素可以考慮。當然最可行嘅就係佢話乜我都接受,咁咪無交嗌囉,但係咪過到自己嗰關先(可欲)。相反對方都係一樣,而且我唔接受佢嘅建議,即係不可行,但佢科組同事又係咪接受我拒絕先?佢又係咪覺得佢嘅公平原則(可欲)係重要過可行性先?

嘩!愈講愈複雜!究竟點拆掂?Sorry 我未答到你呀,因為件事仲發展緊。不如你話我聽,如果你係副校,或者你係某科主任,你會點劃條綫?